काठमाडौं – भार्गव विकास बैंकको ६ लाख ६७ हजार ७०६ कित्ता संस्थापक सेयरको लिलामी आइतबार अन्तिम दिन हो । बैंकको यो सेयरमा आइतबार बैंकिङ समयसम्म मात्र आवेदन दिन पाउने छन् । बैंकले असार १७ गतेदेखि सेयर लिलामीमा ल्याएको हो । यसमा सर्वसाधारणले पनि बोलपत्र पेश गर्न सक्नेछन् । 

बैंकले जेठ ३ देखि १० गतेसम्म पनि यही संख्यामा संस्थापक सेयर लिलामीमा ल्याएको थियो । तर त्यस बेला कोही पनि संस्थापकले आवेदन नदिएपछि सर्वसाधारणले समेत भर्न पाउने गरी फेरि लिलामीमा ल्याएको हो । यसमा न्यूनतम १०० रुपैयाँलाई आधार मानेर बोलपत्र पेश गर्न सकिनेछ । 

लगानीकर्ताले बिक्री प्रबन्धक एनएमबि क्यापिटल नागपोखरी, काठमाडौं तथा एनएमबि बैंकको विराटनगर, बुटवल, सुर्खेत, वीरगञ्ज, पोखरा र धनगढी शाखाबाट आवेदन दिन सक्नेछन् । यसैगरी, भार्गवको प्रधान कार्यालय नेपालगञ्जबाट पनि बोलपत्र फारम भर्न सकिन्छ ।