• अर्थ सरोकार सम्बाददाता 

काठमाडौँ- कतारको सबैभन्दा ठुलो वाणिज्य बैंक ‘दोहा बैंक’ नेपालमा पनि दर्ता भएको छ । नेपालको कम्पनी रजिष्ट्रारको कार्यालयमा बैंक औपचारिक रुपमा दर्ता भएको छ भने राष्ट्र बैंकबाट लाइसेन्ससमेत पाएर कारोबार सुरु गर्ने तयारी गरिरहेको छ । नेपालमा कार्यालय संचालनका लागि दोहा बैंकले असार ३२ गते औपचारिक रुपमा कम्पनी रजिष्ट्रारको कार्यालयमा आफ्नो नाम दर्ता गराएको हो । 

दोहा बैंकले नेपालमा सम्पर्क कार्यालय स्थापनाका लागि १ अर्ब रुपैयाँभन्दा माथी अधिकृत पूँजी राखेर दर्ता भएको कम्पनी रजिष्ट्रारको कार्यालयले जानकारी दिएको छ । दोहा बैंकलाई नेपालमा पनि प्रतिनिधि कार्यालय खोल्न राष्ट्र बैंकले गत २०७५ बैशाखमा स्वीकृत दिएको थियो । 

दोहा बैंकले हालसम्म कुवेत, दुवइ, भारतलगायतका देशमा शाखा कार्यालय संचालनमा ल्याएको छ । साथै जापान, चीन, सिंगापुर, हङकङ, दक्षिण अफ्रिका, दक्षिण कोरिया, अस्ट्रेलिया, टर्की, वेलायत, क्यानडा, जर्मनी, वंगलादेशमा भने प्रतिनिधि कार्यालय रहेका छन् । साथै राष्ट्र बैैंकले दोहा बैंकलाई नेपालमा प्रतिनिधि कार्यालय स्थापनाका लागि स्थान छनोट गर्न तथा स्थायी कर्मचारी नियुक्ती गर्न लाईसेन्स पनि दिएको जानकारी दिएको छ।