काठमाडौँ – प्रमुख प्रतिपक्षी दल नेपाली कांग्रेसले संसद अवरुद्ध गर्ने क्रम रोके पछि आज राष्ट्रिय चिकित्सा शिक्षा विधेयक संसदमा प्रस्तुत भएको छ । डा. गोविन्द केसीले विधेयकमाथि प्रश्न गर्दै अनसन सुरु गरेपछि कांग्रेसले त्यसमा समर्थन गर्दै संसद अवरुद्ध गर्दै आएको थियो ।
गएराति डाक्टर केसी र सरकारबीच सहमति भएको थियो । त्यसबारे आज सदनमा जानकारी गराइएपछि कांग्रेसले संसद अवरुद्ध गर्न छाडेको हो । कांग्रेसका तर्फबाट दर्ता भएको विरोधको सुचना पनि फिर्ता लिएपछि स्वास्थ्य मन्त्री गिरिराजमणि पोखरेलले विधेयक प्रस्तुत गरेका छन् ।
प्रतिनिधि सभाको अर्को बैठक आइतबार ११ बजे बस्नेछ । यसअघि प्राध्यापक डाक्टर गोविन्द केसीसँग सरकारले गरेको ९ बुँदे सहमतिपत्रको प्रतिलिपि उपलब्ध नगराएको भन्दै प्रमुख प्रतिपक्षी दल नेपाली कांग्रेसले प्रतिनिधिसभा बैठक अवरुद्ध पारेको थियो ।
