• अर्थ सरोकार सम्बाददाता 

काठमाडौँ- मेरो माईक्रोफाइनान्सले गत आर्थिक बर्षको चौथो त्रैमासको वित्तीय विवरण प्रकाशनमा चरम लापरबाही गरेको छ । संस्थाले गत बर्षको वित्तीय विवरणमा देखाएको ब्याज आम्दानी र ब्याज खर्चको जोड घटाउमा गल्ती गरिएको छ भने त्यो गल्तीले पूरै वित्तीय विवरण गलत देखाएको छ । संस्थारम लापरवाहीका कारण संस्थाको नाफा नोक्सान तथा प्रतिशेयर आम्दानी लगायतका सूचाङ्कहरु पनि डामाडोल भएका छन् । संस्थाका सीईओ रामहरि दाहालले झारा टार्ने काम गरेजस्तो गरी वित्तीय विवरण भेरिफाइ नगर्दा यस्तो समस्या आएको हो । 

संस्थाले बुधबार विभिन्न पत्रपत्रिकामा प्रकाशित गरेको आफ्नो वित्तीय विवरणमा गत आर्थिक बर्षमा ५३ करोड १९ लाख ब्याज आम्दानी गरेर २६ करोड १४ लाख ब्याज खर्च देखाएको छ । यो हिसाबले संस्थाको खुद ब्याज आम्दानी २७ करोड ५ लाख हुन आउँछ । तर संस्थाले ५ करोड ३० लाख कम २१ करोड ७४ लाख मात्र खुद ब्याज आम्दानी उल्लेख गरेको छ । जसका कारण वित्तीय विवरण पूरै डामाडोल देखिन्छ । यहि कारण संस्थाका अन्य सूचांकहरु पनि गलत देखिएका छन् । संस्थाले आफ्नो वित्तीय विवरणमा खुद नाफा ९ करोड ४७ लाख देखाएको छ । तर सहि अर्थमा हिसाव गर्ने हो भने संस्थाको वास्तविक खुद नाफा १४ करोड ७८ लाख हो । यस्तै प्रतिसेयर आम्दानी ५१ रुपैयाँ ६८ पैसा हुनुपर्ने ठाउँमा संस्थाले ३३ रुपैयाँँ १२ पैसा भनी उल्लेख गरेको छ । 

यसो त यसरी गलत विवरण सार्वजनिक भएको घटना यो पहिलो भने होइन । तर मनपरी वित्तीय विवरण निकाल्ने, र भेरिफाइ नै नगरी पत्रिकामा छाप्ने यस्तो रैबैयाका कारण सोझा लगानीकर्ताहरु फस्ने सम्भावनाप्रति सम्बन्धित निकायको ध्यान जान जरुरी छ ।