• अर्थ सरोकार सम्बाददाता 

काठमाडौँ- नेपाल इन्जिनियरिङ कलेजको व्यवस्थापनको लडाईले विद्यार्थीहरु चपेटामा पर्दा पनि व्यवस्थापनले कुनै चासो नदिएको भन्दै विद्यार्थीहरुले कलेज परिसरमै रिले अनसन सुरु गरेका छन् । व्यवस्थापनको विभिन्न विषयमा पटक-पटक भएको लडाईले विद्यार्थीहरुको पढाइ, कलेजको व्यवस्थापन, लगायतका कुराहरुमा असर पुग्दा विद्यार्थीले क्याम्पसमा पाउनुपर्ने अधिकारमाथि पनि धावा बोलिएको भन्दै विद्यार्थीहरु संघर्षमा उत्रिएका हुन् । क्याम्पसमा भएको व्यवस्थापन विवादले विद्यार्थीको पढाइ ठप्प भएपछि विद्यार्थीहरुले आन्दोलनको बाटो रोजेका हुन् । 

‘कलेजका कामकारवाही ठप्प भएको छ तर कसैले वास्ता गरेको छैन ।’ ‘ नेवि संघका नेता राम शरण आचार्यले अर्थ सरोकार डटकमसँग भने, ‘कलेजमा दुईवटा प्रशासन छ । एकले अर्कोलाई दोष लगाउने काम मात्र भएको छ । विद्यार्थीको समस्या सुनुवाई भएको छैन । विद्यार्थीबाट उठाएको शुल्क पनि विद्यार्थीका लागि हाम्रोसँग सदुपयोग भएको छैन । कलेजमा धेरै कुरालाई लिएर समस्या नै समस्या छ । यसरी त विद्यार्थीको भविष्य साच्चै अध्यारो हुने भएपछी हामीले रिले अनसन सुरु गरेका हौँ । हाम्रो माग पूरा नहुन्जेलसम्म हाम्रो अनसन रोकिने छैन ।’

यता समाजवादी फोरम निकट विद्यार्थी संगठनका नेता इन्द्रदेव शाहले आफ्नो माग पूरा नहुँदासम्म आफ्नो आन्दोलन नरोकिने बताएका छन् । ‘हाम्रो रिले अनसनको आन्दोलन अनिश्चितकालका लागि हो । हाम्रो माग पूरा नभएसम्म हामी आन्दोलनमै हुनेछौं ।’ नेता शाहले अर्थ सरोकार डटकमसँग कुराकानी गर्दै भने, ‘ विद्यार्थीहरु तनावमा छन् । हाम्रो माग छिटो भन्दा छिटो सम्बोधन होस् भन्ने हाम्रो चाहाना छ ।’

यता नेविसंघका अर्का नेता आलोक अधिकारीले कलेजमा दुईवटा प्रशासन भएकाले विद्यार्थीहरुलाई थप मर्का परेको बताएका छन् । ‘भोलिका दिनमा हाम्रो क्यारेक्टर सर्टिफिकेटमा कसले हस्ताक्षर गर्ने भन्नेसमेत द्विविधा हुने स्थिति छ ।’ अर्थ सरोकारसँग कुराकानी गर्दै नेता अधिकारीले अगाडी भने, ‘कलेजमा समस्या नै समस्या छ । यो समाधानका लागि हाम्रो आन्दोलन जारी छ ।’

यता कलेजका कार्यकारी भाइस प्रिन्सिपल मोहनध्वज केसीले भने कलेजको समस्याको समाधान गर्न विभिन्न निकायमा पहल भएको भएपनि ठोस निष्कर्ष भने ननिस्किएको बताएका छन् । 

भिडियोमा  हेर्नुहोस् विद्यार्थी र भाइस प्रिन्सिपलको भनाइ :