- अर्थ सरोकार सम्बाददाता
बिराटनगर – जताततै करको चर्चा चलिरहेका बेला प्रधानमन्त्री केपी शर्मा ओलीले सरकार संचालनको लागि कर आवश्यक भएको बताएका छन् । प्रधानमन्त्री ओलीले मंगलबार प्रदेश नम्बर १ का नेता–कार्यकर्तालाई सम्बोधनको क्रममा पहिले पनि सबैजसो कुरामा कर तिरिँदै आएको र अब पनि आयमा मात्र कर लाग्ने बताएका छन् । यसै क्रममा उनले सय भैँसी पाल्दा कर नलाग्ने तर एउटा बेच्दा आय कर लाग्ने बताए ।
‘सय माउ भैँसी पाल्दा कर लाग्दैन तर एउटा बिक्री गर्दा लाग्छ । हजार लिटर दूध उत्पादन गर्दा कर लाग्दैन, बेचेपछि लाग्छ” प्रधानमन्त्री ओलीले भने । जनतालाई सबै थोक दिने अनि कर नलिएर कहाँबाट दिने ? भन्ने प्रश्न गर्दै प्रधानमन्त्रीले भने, “जनताबाट कर नउठाउने अनि जनतालाई चाहिँ सरकारले सबै थोक दिनुपर्ने ? कहाँबाट ल्याएर दिनु ?” ‘ उनले भने ।
