• अर्थ सरोकार सम्बाददाता 

काठमाडौँ – पछिल्लो समय निकै लोकप्रिय बनेको पेय पदार्थ माउन्टेन ड्यूमा अखाद्य बस्तु मिसावट भएको पाइएको छ । खोटाङमा मट्टिलेतको स्वादमा ड्यु भेटिएपछि यस्तो रहस्य खुलेको हो ।   जिल्लाको साकेला गाउँपालिका–४ मात्तिम मानेभञ्ज्याङको एक पसलमा राखिएको ड्युमा मट्टीतेलको गन्ध पाईएको हो । पसलमा बिक्रीका लागि राखिएको जम्बो ड्युमा मट्टीतेलको गन्ध आएपछि उपयोग नै नगरी नष्ट गरिएको छ । 

अर्थ सरोकार डटकमलाई प्राप्त जानकारी अनुसार साकेला गाउँपालिकाका कर्मचारी, ईलाका प्रहरी कार्यालय मात्तिमका प्रहरी, स्थानीय शिक्षक लगायतले पिउनका लागि किनेको २.२५ लिटरको जम्बो ड्युमा मट्टीतेलको गन्ध आएपछि फालिएको हो । साकेला गाउँपालिकाका प्रमुख अर्जुन खड्काले बताए अनुसार ग्लासमा खन्याइएको ड्यु पिउने क्रममा मट्टीतेलको गन्ध आएपछि बोत्तलको मुखमा सुँघ्दा समेत मट्टीतेलको गन्ध आएको हो । मिसावटको शंका लागेपछि पसलमा गएर अन्य जम्बो ड्युको बोत्तल खोल्दा समेत उस्तै समस्या देखिएपछि पसलमा रहेको पाँच कार्टुन ड्यु नष्ट गरिएको हो ।