काठमाडौँ – बिमस्टेकको १४ औँ शिखर सम्मेलनमा भाग लिन आएका सबै शीर्ष पाहुनालाई राष्ट्रपति विद्या भण्डारीले दिवा भोजको आयोजना गर्नेछिन् । उनीहरूलाई राष्ट्रपतिका सल्लाहकार सुशील प्याकुरेल, राष्ट्रपति कार्यालयका सचिव विनोद केसीलगायतले कार्यालयमा स्वागत गरे ।
बिमस्टेक शिखर सम्मेलनमा आएका भारतीय प्रधानमन्त्री नरेन्द्र मोदी, बंगलादेशी प्रधानमन्त्री शेख हसिना वाजेद, श्रीलंकाली राष्ट्रपति मैत्रीपला सिरिसेना, म्यानमारका राष्ट्रपति विन्ट मिन, थाईल्याण्डका प्रधानमन्त्री प्रयुच चाओचा र भुटानका प्रधानन्यायाधीश छिरिङ वाङचुकका राष्ट्रपति भण्डारीले शीतल निवासमा दिवाभोज आयोजना गरेकी हुन् ।
दिवाभोज अघि नेपालसहित सात वटै राष्ट्रका राष्ट्र प्रमुख तथा सरकार प्रमुखहरुसँग राष्ट्रपतिले संक्षिप्त बैठक गर्ने कार्यक्रम छ । सो संक्षिप्त बैठकमा राष्ट्रपतिले सबै शीर्ष पाहुनाहरुलाई स्वागत गर्नुका साथै बिमस्टेक शिखर सम्मेलन सफलताको शुभकामना दिनेछिन् ।
बिमस्टेक राष्ट्रका राष्ट्राध्यक्ष तथा सरकार प्रमुखहरुसँग राष्ट्रपति भण्डारीले गर्ने बैठकमा उपराष्ट्रपति नन्दबहादुर पुनपनि हुनेछन् । यसैगरी प्रधानमन्त्री केपी शर्मा ओली, परराष्ट्रमन्त्री प्रदीप ज्ञवाली, परराष्ट्र सचिव शंकरदास बैरागी र चिफ अफ प्रोटोकल दीपक अधिकारी सहभागी हुनेछन् ।
शीर्ष पाहुनाहरुसँगको बैठक सकिएलगत्तै राष्ट्रपति कार्यालय परिसरभित्रै आयोजना गरिएको दिवाभोजमा अन्य पाहुनाहरुलाई पनि निमन्त्रणा दिइएको छ ।
तिनमा राष्ट्राध्यक्ष र सरकार प्रमुखका श्रीमान् वा श्रीमति, परराष्ट्रमन्त्री मात्र छन् । विपक्षी दलका नेता, पूर्व प्रधानमन्त्री, सभामुख, प्रधानन्यायाधीश लगायतका नेताहरुलाई बिमस्टेक राष्ट्रका राष्ट्राध्यक्ष र सरकार प्रमुखहरुलाई दिइने दिवाभोजमा निम्तो दिइएको छैन् ।
राष्ट्रपति र शीर्ष पाहुनाहरुबीचको बैठक करिव आधा घण्टाको हुनेछ भने त्यसपछि दिवाभोज सुरु हुनेछ ।
बैठक र दिवाभोजको कार्यक्रम सकिएपछि अपरान्ह ४ बजेदेखि कालिमाटीस्थित सोल्टी होटलमा बिमस्टेक शिखर सम्मेलन सुरु हुनेछ ।
