">
काठमाडौँ – गृहमन्त्री रामबहादुर थापा (बादल)ले कञ्चनपुर घटनाका घाइते अर्जुन भण्डाराको स्वास्थ्य अवस्थाबारे जानकारी लिन महाराजगञ्जस्थित शिक्षण अस्पतालमा पुगेका थिए ।
घाइतेको पिड्युँलामा लागेको गोली निकाल्न अपरेशनका क्रममा उनलाई बेहोस बनाइएका कारण बेहोसी अवस्थामा रहेका भण्डारालाई गृहमन्त्री थापाले भेटेका थिए । गृहमन्त्री थापाको साथमा कञ्चनपुरका सांसदद्वय दीपकप्रकाश भट्ट, नरबहादुर धामी र नेकपाका कार्यकर्ता पनि थिए ।
घाइते भण्डारीको आफन्तसंग कुराकानी गर्दै गृहमन्त्री थापाले सरकारले घाइतेको निःशुल्क उपचार गर्ने आश्वसन दिए । साथै, घाइतेको स्वास्थ्य लाभको कामना समेत व्यक्त गरे ।
किशोरी निर्मला पन्तको बलात्कारपछि हत्याको घटनाबारे छानविन माग गर्दै भएको आन्दोलनका क्रममा प्रहरीले बिहीबार चलाएको गोली लागी भण्डारा घाइते भएका थिए । उनको स्थिति चिन्ताजनक भएकाले हिजै हेलिकोप्टरबाट काठमाडौँ ल्याइएको थियो ।
