काठमाडौं – जनता बैंकले केन्द्रीय बहिरा क्याम्पसलाई नगद तथा कम्प्युटर हस्तान्तरण गरेको छ । बैंकले संस्थागत सामाजिक उत्तरदायित्वअन्तर्गत काठमाडौंको नक्सालमा रहेको केन्द्रीय बहिरा क्याम्पसलाई ५ लाख रुपैयाँ एवम् पाँच थान आई ५ ल्यापटप, एउटा डेस्कटप कम्प्युटर र एउटा प्रोजेक्टर प्रदान गरेको हो ।
बिहीवार आयोजित एक कार्यक्रमबीच बैंकका प्रमुख कार्यकारी अधिकृत परशुराम कुँवर क्षेत्रीले क्याम्पसका प्रतिनिधिलाई सहयोग हस्तान्तरण गरेका हुन् । बैंकले विगत ३ वर्षदेखि उक्त क्याम्पसलाई आर्थिक सहयोग उपलब्ध गराउँदै आएको छ । बैंकले सामाजिक उत्तरदायित्व कार्यक्रमअन्तर्गत शिक्षा र स्वास्थ्यलाई प्राथमिकतामा राखी कार्य गरिरहेको छ ।
बैंकले हाल देशभर १ सय २३ शाखा, ४० शाखारहित बैङ्किङ, दुई सीमित्त बैङ्किङ एकाइ, दुई एक्सटेन्शन काउण्टर तथा ७१ एटीएम काउण्टरमार्फत वित्तीय सेवा प्रदान गरिरहेको छ ।
