• अर्थ सरोकार संबाददाता 

काठमाडौँ- लगानीकर्ताहरुको दवाब समूहले जारी आमरण अनसन तोडेको छ। आमरण अनसन सुरु गरेको चौथो दिन अनसन तोडेको हो । आमरण अनसनमा दवाब समूहका संयोजक हरि ढकाल र तिलक कोइराला सहभागी थिए । उनीहरुले आमरण अनसन थालेको चौथो दिन बिहीबार एकअर्कालाई पानी खुवाएर तोडेका हुन् । 

‘हाम्रो उद्देश्य सेयर बजारको विकास र बिस्तार होस् भन्ने थियो । योभित्रका समस्याको समाधान होस् भन्ने थियो ।’ शान्तिपूर्ण आन्दोलनको बाटो रोज्दा हामीलाई अराजक भनियो, तर प्रतिवेदनमा समेटिएका बिषय कार्यान्वयन नभए म फेरि माफियाहरुको काल बनेर आउँछु, म बारुद बनेर आउँछु ।’ अनसन तोडेपछि हरि ढकालले भने

यता तिलक कोइरालाले आफूहरु पनि नेकपाकै कार्यकर्ता भए पनि सरकारको गलत रबैयाका कारण दुःख पाएको बताए । ‘सबै लगानीकर्ता संगठित भएर लडाई लडौं अब । हामी यत्रो दिन अनसन बस्दा समेत सरकारी अधिकारी आएर सोधपुछसम्म गरेनन्, तर हाम्रो कुनै गुनासो छैन । किनभने यो राज्य निर्दयी हो । यो राम्रा मान्छेलाई सूली चढाउने देश हो ।’ उनले भने ।