- अर्थ सरोकार संबाददाता
काठमाडौँ – नेपाल राष्ट्र बैंकद्वारा व्यापारी अजेयराज सुमार्गीको ८४ करोड रुपैयाँ फुकुवा भएको छ । राष्ट्र बैंकले स्रोत नखुलेको भनी रोक्का राखिदिएको उनको रकम फुकुवा गरिदिएको हो । अजेयराज सुमार्गीको मुक्तिश्री सिमेन्ट उद्योगमा आएको वैदेशिक लगानी रकम सर्वोच्च अदालतले खोलिदिएको हो। सर्वोच्च अदालतले सरकारका नाममा उक्त रकम नरोक्न भन्दै अन्तरिम आदेश जारी गरेपछि उनको रकम फुकुवा भएको हो ।
सर्वोच्च अदालतका न्यायधीश दीपकराज जोशीको मंगलबारको एकल इजलासले यस्तो अन्तरिम आदेश दिएको हो । ‘सुविधा र सन्तुलन’ को कारण देखाई अदालतले पुस २४ गतेसम्म खाता सञ्चालनमा अवरोध नगर्न भनी अन्तरिम आदेश दिएको हो । सर्वोच्चको यो आदेशसँगै सुमार्गीको करिब ८४ करोड (७.५ मिलियन अमेरिकी डलर) फुकुवा भएको छ ।
‘उद्योगको खातामा रहेको रकम उसको आवश्यकता र समयतालिका बमोजिम माग गरेका बखत भुक्तानी दिनू, दिलाउनु र सोसम्बन्धी खाता सञ्चालनमा अर्को आदेश नभएसम्म कुनै अवरोध नगर्नु नगराउनू’ आदेशमा भनिएको छ ।
यसअघि अदालतको आदेशपछि सुमार्गीले नबिल र नेपाल इन्भेष्टमेन्ट बैंकमा रोकिएको करिव दुई करोड १३ लाख अमेरिकी डलर भुक्तानी पाएका थिए।
