">
- सुरज प्याकुरेल / अर्थ सरोकार डटकम
काठमाडौँ- नेपाल चार्टड एकाउन्टेन्ट्स संस्था (आइक्यान)ले आफैंले बनाएको कार्यविधि विपरित सिए फर्मको नामको अप्रुभल दिएको प्रमाण अर्थ सरोकारले फेला पारेको छ । आइक्यानले चार्टड एकाउन्टेन्ट सुजन काफ्ले, लव खत्री र राजाराम कंडेलको साझेदारी फर्मलाई आफ्नै कार्यविधि विपरितको नाम दिएको हो । उक्त सिए फर्मको नाम ‘सुजन काफ्ले एलआर एसोसिएट्स’ रहेको छ । कार्यविधि अनुसार एउटा पार्टनरको पूरा नाम र अरु दुइ पार्टनरका नामको पहिलो अक्षर प्रयोग गरेर यसरी फर्मको नाम राख्न पाईदैन ।
आइक्यान स्रोतले दिएको जानकारी अनुसार आइक्यानका एक पूर्व अध्यक्षको भनसुनमा यस्तो गैरकानुनी काम भएको हो । ‘आइक्यानका एक पूर्व अध्यक्षले यस्तो नाम मिल्छ दिनु भनेर अर्हाए । अध्यक्षले भनेपछि बिचरा बिनोद न्यौपानेले कहाँ नियम हेर्न भ्याउनु ?’ ती कर्मचारीले भने, ‘यसअघि भनसुनकै आधारमा अर्को एक चलेको फर्मलाई पनि नियम विपरित नाम दिइएको थियो । अहिले उक्त फर्मले नाम फेरेको छ ।’
हेर्नुहोस् आइक्यानको कार्यविधि : कसरी मात्र नाम राख्न पाइन्छ भन्ने नियम यस्तो छ !
के भन्छ आइक्यान ?
सिए फर्मको नाम स्वीकृति दिने अधिकार पाएका आइक्यानका कर्मचारी बिनोद न्यौपानेसंग हामीले शुक्रबार ‘नियम विपरित सुजन काफ्लेको सिए फर्मले कसरी नाम पायो ?’ भनी प्रश्न गरेका थियौं । जवाफमा न्यौपानेले आफुले यसबारे बुझ्ने बताएका थिए । उनले आफु काठमाडौँबाहिर भएकाले आइतबार आइक्यान पुगेर यस विषयमा बुझ्ने बताए । आइतबार हामीले यस विषयमा फलोअप गर्दा आफ्नो गल्ती स्वीकार्दै उनले भने, ‘हो ! गल्ती भएको रहेछ । मैले शुक्रबार नै फोन गरेर बुझ्न लगाएको थिएँ । गल्ती भएको रहेछ । अव करेक्सन गर्छौं । सुरज भाइलाई विशेष धन्यवाद छ । हामीले थाहा नपाएको कुरा पनि पत्ता लगाईदिनुभयो ।
सुजन काफ्ले भन्छन्, ‘आइक्यानले दियो, मिल्छ भन्ने लाग्यो’
यस विषयमा बुझ्न हामीले सिए सुजन काफ्लेलाई समेत फोन गरेका थियौं । उनले आइक्यानले नाम दिएपछि गलत कसरी भयो होला र भनी उल्टै प्रतिप्रश्न गरे । ‘दिन्छ कि दिंदैन भनेर ट्राइ गरेको, दियो । आइक्यानले दिएपछी नाम प्रयोग गर्यौं । आइक्यानले भएन भन्छ भने सच्याउन तयार छौं ।’ उनले भने । उनको कुरा सुन्दा उनलाई यो नाम नियम विपरित थियो भन्ने थाहा रहेको बुझिन्छ । त्यसपछि हामीले फेरी सोध्यौँ, ‘तपाईंले मिलाएर, कसैलाई प्रभावमा पारेर नाम लिएको भन्ने कुरा आएको छ के हो ?’ जवाफमा उनले भने, ‘त्यस्तो होइन । हामीले दिन्छ कि भनेर नाम मागेको, आइक्यानले दियो । आइक्यानले दिइनैसकेपछि हामीले प्रयोग गरेका हौँ ।’
