काठमाडौँ । संसदीय समितिमा ‘औद्योगिक व्यवसायसम्बन्धि प्रचलित कानुनलाई संशोधन र एकीकरण गर्न बनेको विधेयक’ माथि पनि दफावार छलफल सुरु गरिएको छ । संघीय संसदको उद्योग तथा वाणिज्य र श्रम तथा उपभोक्ता हित समितिको मंगलबारको बैठकमा सो विधेयकमाथिको दफावार छलफल सुरु गरिएको हो । बैठकमा बोल्दै उद्योग सचिव यामकुमारी खतिवडाले औद्योगिक क्षेत्रको विकास गरी मुलुकको अर्थतन्त्रलाई सवल बनाउने मूल उद्देश्यका साथ सो विधेयक संसदमा पेश गरिएको स्पष्ट पार्नुभयो । उहाँले विधेयकले आयात प्रतिस्थापन गर्ने कामलाई जोड दिएको पनि बताउनुभयो ।
विधेयकमा उद्योग दर्ता गर्ने निकायले उद्योग दर्ता नगरेमा उजुरी गर्न पाउने प्रावधान पनि राखिएको छ । त्यसैगरी उद्योग संचालन भएको जानकारी ३० दिन भित्र अनिवार्य रुपमा सम्बन्धित निकायमा गराउनुपर्ने पनि विधेयकमा समावेश गरिएको सचिव खतिवडाले बताउनुभयो । बैठकमा बोल्दै उद्योग, वाणिज्य तथा आपूर्तिमन्त्री मातृकाप्रसाद यादवले आवश्यक संशोधन हालेर सो विधेयकलाई समृद्ध बनाउन समितिका सदस्यहरुलाई आग्रह गर्नुभयो । उहाँले विधेयकलाई समृद्ध बनाउन सरकारले संसदमा पेश गरेको पनि स्पष्ट पार्नुभयो ।
विधेयकको प्रस्तावनामा उद्योग क्षेत्रको प्रभावकारी व्यवस्थापन गर्ने पनि उल्लेख गरिएको छ । हेर्नुहोस् भिडियो :
