काठमाडौँ । सनराइज बैंकका अध्यक्ष मोतिलाल दुगडको अध्यक्ष पद पनि चैट भएको छ । नेपाल राष्ट्र बैंकले एक सर्कुलर जारी गर्दै अवदेखि ७० बर्षभन्दा माथि रहेका व्यक्ति बैंकको अध्यक्ष बन्न नपाउने र बनिरहेकाहरुको हकमा ७४ काटेका व्यक्ति बैंकका अध्यक्ष भएको खण्डमा पदमुक्त हुने जानकारी दिएपछि उनी पदमुक्त भएका हुन् । तर राष्ट्र बैंकको सर्कुलरको अटेरी गर्दै उनले अझै पनि पद नछोडेको सनराइज स्रोतको दावी छ ।
यस अघि उमेरहदका कारण नबिल बैंकका अध्यक्ष, एभेरेष्ट बैंकका अध्यक्षको पनि पद चैट भएको थियो भने प्राइम बैंकका सीइओ पनि उमेरहदकै कारण पदमुक्त भएका थिए । यद्यपी उनी उमेरहदको व्यवस्था विरुद्ध अहिले सर्वोच्च अदालत गएका छन् । सर्कुलर जारी गर्दै नेपाल राष्ट्र बैंकले बैंक तथा वित्तीय संस्थाको संचालकको लागि ७० वर्षको उमेर हद तोकेको छ भने प्रमुख कार्यकारी अधिकृतको हकमा ६५ वर्षको उमेर हद तोकिएको छ । राष्ट्र बैंकको निर्देशिका कार्यान्वयनमा आएसँगै एभरेष्ट बैंकका अध्यक्ष बिके श्रेष्ठले तत्कालै पद छाड्नुपर्छ ।
नागरिकताको कपि राष्ट्र बैंकका हाकिमसम्म पुग्यो !
अझ रमाइलो कुरा त के छ भने सनराइज बैंकका एक उच्च अधिकारीले नै आफ्ना अध्यक्षको नागरिकता राष्ट्र बैंकका हाकिमसम्म पुर्याएका छन् । उनकै मोबाइलबाट दुगडको नागरिकता राष्ट्र बैंकको हाकिमसम्म पुगेको छ । यो कामलाई बैंकका सीइओ जनक शर्मा पौड्याललेसमेत बढावा दिएको आरोप सनराइज बैंकका कर्मचारीहरुको छ । यो सूचना भेरिफाइ गर्न खोज्दा भने सीइओ पौड्याल अर्थ सरोकारको सम्पर्कमा आएनन् । यद्यपी नेपाल राष्ट्र बैंकका एक कार्यकारी निर्देशकले भने सनराइज बैंकका सीइओबाट नै आफुले उक्त तथ्य पत्ता लगाएको दावी गरेका छन् ।
