काठमाडौं । नेपाल इन्फ्रास्ट्रक्चर बैंकको साधारण सभा आज (आइतबार) हुँदैछ । पूर्वाधार क्षेत्रमा लगानी जुटाउने मुख्य उद्देश्यका साथ संचालनमा आएको उक्त बैंकको साधारण सभा आइतबार ४ बजेदेखि र्याडिसन होटलमा सुरु हुने भएको हो ।
बैंकले सभामा हालसम्मकै ठूलो साधारण सेयर निष्कासन गर्ने विशेष प्रस्ताव पारित गर्ने जनाएको छ । बैंकले ८ अर्ब रुपैयाँ बराबरको ८ करोड कित्ता साधारण सेयर निष्कासन गर्ने प्रस्तावसहित सभा डाकेको हो ।
साथै सभाले आइपीओ निष्कासनको प्रस्तावसहित चुक्ता पुँजी वृद्धि गरी २० अर्ब पुर्याउने, सञ्चालक नियुक्तिलाई अनुमोदन गर्ने र संस्थापक समूहबाट प्रतिधित्व गर्ने सञ्चालकहरुको निर्वाचन गर्ने लगायतका प्रस्ताव पारित पनि गर्नेछ भने बैंकको चुक्ता पुँजीमा भएको वृद्धिसँगै बैंकको प्रबन्धपत्रमा संशोधन वा थप गर्नेछ ।
बैंकको नेतृत्व अनिल ज्ञवालीले गरिरहेका छन् । अनुज अग्रवाल अध्यक्ष रहेको यस बैंकका अन्य सञ्चालकहरुमा मुकुन्दप्रसाद पौड्याल, चन्द्रप्रसाद ढकाल, लालमणि जोशी, नुमनाथ पौड्याल छन् ।
यस बैंकमा सरकारको १०%, बिमा कम्पनीहरुको १८.९७%, वाणिज्य बैंकहरुको २०.८९%, निजी तथा सार्वजनिक कम्पनीहरुको ५.१५%, व्यक्तिगत ४. ९९% तथा सर्वसाधारणको ४०% स्वामित्व रहनेछ ।
