काठमाडौँ – सिटिजन्स बैंक इन्टरनेशनलले चालु आर्थिक वर्षको दोस्रो त्रैमासको वित्तीय विवरण सार्वजनिक गरेको छ । बैंकले यस अवधिमा ६८ करोड ७७ लाख १ हजार रुपैयाँ मात्र कमाएको वित्तीय विवरण सार्वजनिक गरेको हो । गत वर्ष बैंकले ७७ करोड नाफा आर्जन गरेको थियो । जसमा बैंकको नाफा १०.७२ प्रतिशतले घटेको देखिएको छ ।

गत आर्थिक वर्षको पुस मसान्तसम्ममा २ अर्ब ८० करोड २३ लाख ब्याज खर्च गरेको यस बैंकले चालु आवको सोही अवधिमा ३ अर्ब २४ करोड १९ लाख रुपैयाँ खर्च गरेको छ। यसले बैंकको खुद ब्याज आम्दानी घटाउनुका साथै खुद नाफा पनि घटाएको छ। 

साथै, बैंकको प्रतिशेयर आम्दानीमा पनि असर परेको छ । गत आवको पुस मसान्तसम्ममा १८ रुपैयाँ ४२ पैसा रहेको बैंकको प्रतिशेयर आम्दानी चालु आवको सोही अवधिमा २ रुपैयाँ ४७ पैसा घटेर १५ रुपैयाँ ९५ पैसामा कायम भएको छ । प्रतिशेयर नेटवर्थ १४१ रुपैयाँ १३ पैसा कायम भएको छ।

यस अवधिसम्म आउँदा बैंकले ७५ अर्ब ५९ करोड ३३ लाख रुपैयाँ निक्षेप सङ्कलन गरी ६९ अर्ब ९ करोड ८१ लाख रुपैयाँ कर्जा प्रवाह गरेको छ । बैंकको सञ्चालन मुनाफा पनि १३ करोड ४ लाख ९२ हजार रुपैयाँ घटेर ९५ करोड ५९ लाख ७९ हजार रुपैयाँमा सीमित भएको छ।

बैंकको जगेडा कोषमा २ अर्ब ८८ करोड ३१ लाख रुपैयाँ रहेको छ ।