काठमाडौँ । कृषि विकास बैंकको सिस्टम ह्याक गरी रकमसहित फरार भएका दिपक नेपाल पक्राउ परेका छन् । १ करोड रकमसहित फरार भएका  ४३ वर्षीय नेपाललाई महानगरीय प्रहरी अपराध महाशाखाको टोलीले गत पुस १८ गते पक्राउ गरेको हो । 

प्रहरीले यसअघि सोहि प्रकरणमा १६ जनालाई पक्राउ गरिसकेको छ । बैंकको रकम निकाल्ने मुख्य योजनाकार अफ्रिकी मुलका काले भनिने पिटर रहेको प्रहरीले जनाएको छ । नेपालका बैंकहरुबाट ५ अर्ब नेपाली रुपैयाँ भन्दा बढी रकम निकाल्ने योजना नै पिटरेको रहेको प्रहरीले जनाएको छ । 

बैंकको लहान शाखाबाट विभिन्न ७ जना व्यक्तिको नाममा करिब ४ करोड रुपैयाँ ट्रान्सफर गरिएको थियो ।  जसमा डेढ करोडभन्दा बढी रुपैयाँ उनीहरुले निकालिसकेका थिए भने बाँकी रकम निकाल्ने क्रममा दुई जना पक्राउ परेको बैंकले जनाएको छ । 

पक्राउ परेका नेपाललाई थप अनुसन्धानका लागि महानगरीय प्रहरी परिसर काठमाडौँ पठाइएको पनि महाशाखाका प्रमुख एसएसपी सहकुल थापाले जानकारी दिए ।