काठमाडौं । अर्थमन्त्री डा. युवराज खतिवडालाई अर्थमन्त्री पदबाट हटाउन केहि व्यापारीहरुले लबिङ  गरेको खुलासा भएको छ । बुधबार प्रधानमन्त्री केपी शर्मा ओलीले राष्ट्रियसभाको एक सदस्यका लागि अर्थमन्त्री खतिवडाको नाम सिफारिस गरेपछि प्रधानमन्त्री निकट स्रोतले यस्तो दाबी गरेको हो ।

फागुन २० देखि रिक्त हुने राष्ट्रियसभाको सदस्य पदमा उपाध्यक्ष बामदेव गौतमलाई लैजाने निर्णय गरिएको भए पनि ओलीले अर्थमन्त्री खतिवडालाई निरन्तरता दिनेगरी खतिवडाको नाम सिफारिस गरेका थिए । बामदेब गौतमको नाम सिफारिस गर्ने पार्टीको निर्णय विपरित ओलीले यस्तो गरेपछी नेकपाभित्र लफडा सुरु भएको छ ।

प्रधानमन्त्री स्रोतका अनुसार तीनजना व्यापारीले प्रचण्डको आडमा यस्तो लविङ सुरु गरेका हुन् । स्रोतका अनुसार नेपालका एकमात्र खर्बपति बिनोद चौधरी,गैरआवासीय नेपाली संघ (एनआरएनए)का संस्थापक अध्यक्ष तथा अर्का अर्बपति व्यवसायी उपेन्द्र महतो र पछिल्लो एक दशकमा प्रचण्ड निकट व्यवसायी अजेय राज सुमार्गीले खतिवडालाई अर्थमन्त्री पदबाट हटाउन लबिङ गरेका हुन्।