काठमाडौं – बैंक अफ काठमान्डूले १६ लाख कित्ता ऋणपत्र जारी गर्ने भएको छ । बैंकले उक्त ऋणपत्र जारी गर्न रेटिङ गराएको छ । रेटिङ एजेन्सी इक्रा नेपालले यो ऋणपत्रलाई मध्यम कर्जा जोखिम जनाउने ‘इक्रा एनपी बीबीबी प्लस’ रेटिङ दिएको हो ।
बैंकले प्रति कित्ता १ हजार रुपैयाँ दरमा १ अर्ब ६० करोड रुपैयाँ बराबरको ऋणपत्र बिक्री गर्न लागेको हो । बैंकले जारी गर्ने ऋणपत्रमध्ये ६ लाख ४० हजार कित्ता सर्वसाधारणका लागि खुला हुनेछ भने बाँकी ९ लाख ६० हजार कित्ता संघसंस्थालाई बिक्री गरिनेछ ।
बैंकले १० वर्ष अवधिको ‘बीओके ऋणपत्र–२०८६’ ऋणपत्र जारी गर्न लागेको हो । यस ऋणपत्रमा वार्षिक १०.२५% ब्याजदर पाइनेछ । यसमा बिक्री प्रबन्धकको काम नबिल इन्भेष्टमेन्ट एन्ड बैकिङ लिमिटेडले गर्नेछ । अब नेपाल धितोपत्र बोर्डले अनुमति दिएपछि बिक्री प्रक्रिया अघि बढ्नेछ ।
