काठमाडौं । अर्थमन्त्री एंव सञ्चार तथा सूचना प्रविधिमन्त्री डाक्टर युवराज खतिवडाले नेपाल राष्ट्र बैंकको गभर्नर चैत ५ गतेभित्रै नियुक्त हुने बताएका छन् । सञ्चार तथा सूचना प्रविधि मन्त्रालयमा विहिबार नेपाल सरकारको मन्त्रीपरिषद्का निर्णय सार्वजनिक गर्दै खतिवडाले यस्तो बताएका हुन् । 

सरकारका प्रवक्ता समेत रहेका मन्त्री खतिवडाले भने ‘म पनि गभर्नरमा नियुक्ति भएको व्यक्ति हुँ, एक महिना अघि त होइन, अन्तिम समयमै भएको हो । मेरो कार्यालयको अन्तिम दिन पनि ३ बजेतिर मन्त्रीपरिषदको बैठकले नयाँ गभर्नर नियुक्ती गरेको थियो । त्यसपछि मात्रै मैले गभर्नरको कार्यालय छाडेको हो। ’

मन्त्रीपरिषद्का निर्णय सार्वजनिक गर्दै खतिवडाले समग्र मुलुकको एकिकृत वित्तिय विवरणले विकास खर्च राम्रो भएको पनि बताए। उनले आर्थिक बर्षको अन्त्यसम्ममा बजेटको ९० प्रतिशत भन्दा बढी खर्च हुने दाबी समेत गरे । निर्माण व्यवसायी, ठेक्का पट्टा सम्बन्धी विवाद लगायतका कारण आर्थिक बर्षको सुरुवाती दिनमा विकास खर्च हुन नसकेपनि पछिल्लो अवस्था सन्तोषजन रहेको पनि बताए।