काठमाडौं – केन्द्रीय कार्यालय काभ्रेपलान्चोकको बनेपामा रहेको मिर्मिरे लघुवित्त वित्तीय संस्थाले झापाको बिर्तामोडमा रहेको नागबेली लघुवित्तलाई प्राप्ति गर्ने भएको छ । मिर्मिरे लघुवित्तले नागबेली लघुवित्तलाई एक्वायर गर्न  मंगलवार (फागुन १३ गते) सम्झौतापत्रमा  हस्ताक्षर भएको हो ।

यसअघि मिर्मिरे, किसान र नागबेली मर्जमा जाने सहमति गरेका थिए । तर, मर्जर प्रक्रिया भाँडिएपछि किसान लघुवित्त यो प्रक्रियाबाट बाहिरिएको छ भने  मिर्मिरेले नागबेलीलाई एक्वायर गर्न लागेको छ ।  गत वैशाखमा ३ कम्पनी मर्जमा जाने निर्णय गरेका कारण हाल मिर्मिरे र नागबेली दुवैको सेयर कारोबार रोक्का छ । अब एक्विजिसन प्रक्रिया सम्पन्न भएपछि मात्र सेयर कारोबार खुल्नेछ ।

हाल मिर्मिरेको चुक्ता पुँजी १२ करोड ८७ लाख रुपैयाँ रहेको छ । चालु आर्थिक वर्षको दोस्रो त्रैमासमा कम्पनीले ३ करोड ९८ लाख रुपैयाँ खुद नाफा कमाएको छ । यता, नागबेली लघुवित्तको हाल चुक्ता पुँजी १६ करोड ७६ लाख रुपैयाँ रहेको छ । सेयर स्वाप अनुपात भने खुलाइएको छैन ।