काठमाडौँ – नेपालको पूँजीबजारमा बिहिबार इतिहासमै सबैभन्दा ठुलो कारोबार भएको छ । आज नेप्सेमा ४ अर्ब ४६ करोडमाथिको कारोबार भएको छ । यो अहिलेसम्मकै सबैभन्दा बढी कारोबार हो । बुधबारको तुलनामा नेप्से परिसूचक ३६.०५ अंकले बढेर १६३२.१७ बिन्दुमा पुगेको छ । बिहिबार बजारले आफ्नै रेकर्ड तोडेर नयाँ रेकर्ड कायम गरेको छ ।

नेपाल स्टक एक्सचेन्ज (नेप्से)का अनुसार कुल १ सय ८० कम्पनीको १ करोड ८ लाख ५९ हजार ६ सय ५६ कित्ता सेयर खरिद बिक्री हुँदा ४ अर्ब ४६ करोडमाथिको कारोबार भएको छ । जसमा सबैभन्दा बढी कारोबार नेपाल लाइफ इन्स्योरेन्सको भएको छ । यस कम्पनीको कुल २१ करोड ९९ लाखमाथिको कारोबार भएको छ । त्यसपछि कारोबार क्रमश : एनआइसी एसिया बैंक र एनएमबि बैंकको भएको छ ।

यता, बिहिबार बैंकिङ्ग, विकास बैंक र म्यानुफ्याक्चर एण्ड प्रोडक्सन उपसुचक बढेका छन् भने बाँकी सबै उपसुचक घटेका छन् । त्यसैगरी सबैभन्दा धेरै एभरेष्ट बैंक र नेपाल एसबिएस बैंकका लगानीकर्ताले कमाएका छन् भने सबैभन्दा धेरै ङदी ग्रुप पावर र सिनर्जी पावरका लगानीकर्ताले गुमाएका छन् ।