काठमाडौं – प्रिमियर इन्स्योरेन्सले आफ्नो स्वामित्वमा रहेको नागरिक लगानी कोषको ५० हजार कित्ता सेयर लिलामी भर्ने आज अन्तिम दिन रहेको छ । नागरिक लगानी कोषले संस्थापक समूहको सेयर बिक्री खुला गरेको थियो । यसमा बैंक तथा वित्तीय संस्था र बीमा कम्पनीहरुले मात्र आवेदन दिन सक्नेछन्। 

कम्पनीले संस्थापक समूहको सेयर माघ २९ गतेदेखि बिक्री खुला गरेको हो । यस सेयरमा लगानीकर्ताले न्यूनतम १७ सय ५० रुपैयाँलाई आधार मानेर प्रतिस्पर्धात्मक बोलकबोलमा सहभागी हुनुपर्नेछ । न्यूनतम १०० कित्तादेखि अधिकतम सबै ५० हजार कित्तासम्म आवेदन दिन सकिनेछ । 

लगानीकर्ताले बिक्री प्रबन्धक ग्लोेबल आइएमई क्यापिटल, राष्ट्रिय नाचघर काठमाडौं र प्रिमियर इन्सुरेन्सको केन्द्रीय कार्यालय नारायणचौर काठमाडौंबाट आवेदन दिन सक्नेछन् । यसैगरी, ग्लोबल आइएमई बैंकको विराटनगर, वीरगञ्ज, हेटौडा, पोखरा, बुटवल, सुर्खेत र धनगढी शाखा कार्यालयबाट पनि आवेदन दिन पाइनेछ ।