काठमाडौँ – प्राइम कमर्सियल बैंक लिमिटेडले चालु आर्थिक वर्षको दोस्रो त्रैमासको वित्तीय विवरण सार्वजनिक गरेको छ । बैंकले पुसमसान्तसम्ममा अधिकांश सूचकहरुसँगै खुद नाफा २२.६१% ले वृद्धि गरी १ अर्ब ३० करोड  रुपैयाँ कमाउन सफल भएको वित्तीय विवरण सार्वजनिक गरेको हो ।

बैंकको यो नाफा गत वर्षको भन्दा २३ करोड ९८ लाख रुपैयाँले बढी हो । गत वर्षको सोहि अवधिमा बैंकले १ अर्ब ६ करोड खुद नाफा कमाएको थियो।

सार्वजनिक वित्तीय विवरण अनुसार बैंकका दुइ सूचक सञ्चालन मुनाफा र खुद ब्याज आम्दानी पनि बढेका छन् ।जसकारण खुद नाफा बढेको देखिन्छ । पुस मसान्त सम्ममा बैंकले खुद ब्याज आम्दानी ३९ करोड २४ लाख रुपैयाँले बढाएर २ अर्ब १६ करोड रुपैयाँ पुर्याएको छ । यस्तै सञ्चालन मुनाफा पनि  २२ करोड ९२ लाख रुपैयाँले बढाएर १ अर्ब ८५ करोड रुपैयाँ पुर्याएको छ । 

हाल यस बैंकको चुक्ता पूँजी ९ अर्ब ६८ करोड रहेको छ । जगेडा कोषमा ३ अर्ब १९ करोड रुपैयाँ जम्मा गरेको छ । सो अवधिसम्ममा बैंकले ८० अर्ब ३५ करोड रुपैयाँ निक्षेप सङ्कलन गरी ८० अर्ब ९१ करोड रुपैयाँ कर्जा लगानी गरेको पनि वित्तीय विवरणमा उल्लेख छ । 

पुस मसान्तसम्ममा बैंकको प्रतिशेयर आम्दानी २६ रुपैयाँ ८६ पैसा र प्रतिशेयर नेटवर्थ १५८.४१ रुपैयाँ रहेको छ ।बैंकको आधार ब्याजदर ९.४५ प्रतिशत रहेको छ भने कोषको लागत ७.६५ प्रतिशत रहेको छ।