काठमाडौं । विद्युतीय सवारी प्रयोगकर्ताहरुलाई खुशीको खबर रहेको छ। विद्युतीय सवारी अब ४  रुपैयाँ ४५ पैसामा ‘फुल चार्ज’  हुने भएको छ। प्रयोगकर्ताले सवारी रातीको ११ बजेदेखि विहान ५ बजेसम्म ४ रुपैयाँ ४५ पैसा मात्रै प्रतियुनिट महसुल तिर्नुपर्नेछ। नेपाल विद्युत् प्राधिकरणले विद्युत् नियमन आयोगमा पठाएको महसुल दर अनुसार यस्तो व्यवस्था भएको हो। जुन महसुल सबैभन्दा सस्तो हो ।

यस्तै व्यवस्था अनुसार साँझ ५ बजेदेखि राती ११ बजेसम्म भने प्रतियुनिट ८ रुपैयाँ ४० पैसा महसुल लाग्नेछ भने यो सुविधा ३३ केभी भोल्टजका लागि हो । सोही भोल्टजेजमा राती ११ बजेदेखि बिहान ५ बजेसम्म ५ रुपैयाँ ५ पैसा महसुल लाग्नेछ । अरु समयको हकमा भने ३३ केभी भोल्टेजका लागि ६ रुपैयाँ ६० पैसा र ११ केभी भोल्टेजका लागि ६ रुपैयाँ ९० पैसा महसुल लाग्नेछ । 

पुसदेखि चैतसम्मको फरक महसुल दर तय गरिएको छ । विद्युतीय सवारी प्रयोगकर्ताहरुले यस अवधिमा ३३ केभी भोल्टेजका लागि ८ रुपैयाँ ४० पैसा महसुल तिर्नुपर्नेछ भने ११ बजेदेखि ५ बजेसम्मका लागि ६ रुपैयाँ ६० पैसा महसुल लाग्नेछ । यस्तै ११ केभी भोल्टेजको महसुल दर पनि तय गरिएको छ । यसमा साँझ ५ बजेदेखि ११ बजेसम्म ११ रुपैयाँ ७० पैसा र राती ११ बजेदेखि बिहान ५ बजेसम्म ५ रुपैयाँ ५ पैसा महसुल तिर्नुपर्नेछ भने अन्य समयमा भने १० रुपैयाँ ३० पैसा महसुल लाग्नेछ ।

योसँगै विद्युतीय सवारी प्रयोगकर्ताहरुलाई महसुलमा सहज हुने भएको छ।