काठमाण्डौ – क्रिकेट खेलाडी सङ्घ नेपाल (सिप्यान) ले आयोजना गर्ने सिप्यान क्रिकेट अवार्ड स्थगित भएको छ। कोरोना भाइरस सन्त्रासका कारणले उक्त कार्यक्रम स्थागित गरिएको सिप्यानले जनाएको छ । यसअघि चैत २१ गते अवार्ड हुने तय थियो ।

सिप्यानले एक विज्ञप्ति निकाल्दै तत्कालका लागि अवार्ड स्थगित गरेको जनाएको छ । अवार्डमा पुरुष र महिला खेलाडीलाई वर्षको उत्कृष्ट क्रिकेटरको अवार्ड,उदयीमान खेलाडी, उत्कृष्ट क्षण र लाइफटाइम अचिभमेन्ट अवार्ड समेत प्रदान गरिने तय थियो।

वर्षको उत्कृष्ट महिला र पुरुष खेलाडीलाई १ लाख ३२ हजार रुपैयाँ तथा उदयीमान खेलाडी, उत्कृष्ट क्षण र लाइफटाइम अचिभमेन्ट विधाका विजेतालाई समान ६६-६६ हजार रुपैयाँ दिइने घोषणा गरिएको थियो।