डोटी – डोटीको क्वारेण्टाइनमा भारतका विभिन्न शहरबाट फर्केका तीन सय ९४ जनालाई राखिएको छ । नेपाल सरकारले दिएको निर्देशनअनुसार डोटीका क्वारेण्टाइनमा भारतबाट आएकाहरुलाई राखिएको हो। 

डोटीका कोरोनासम्बन्धी सम्पर्क व्यक्ति सूर्य विष्टका अनुसार डोटी जिल्लाका विभिन्न स्थानीय तहका २४ स्थानमा क्वारेण्टाइन स्थापना गरिएको र कुल क्षमता पाँच सय १७ शय्या रहेको छ ।

क्वारेण्टाइनमा बसेकाहरु सबै भारतका विभिन्न शहरबाट आएको विष्टले बताए । भारत तथा तेस्रो मुलुकबाट नेपाल आएर घरमै बसेकाहरुको सम्बन्धित स्थानीय तहले खोजी गरिरहेको समेत बिष्टले बताए । उनले भने ‘स्थानीय तहका जनप्रतिनिधि र स्वास्थ्यकर्मीले घरमै लुकेर बसेकाहरुलाई सम्झाउँदै क्वारेण्टाइनमा राख्ने काम गरिरहेका छन् ।’

क्वारेण्टाइनमा रहेका व्यक्तिहरुको खाना र खाजाको व्यवस्था सम्बन्धित स्थानीय तहहरुले नै गरिरहेको डोटीका प्रमुख जिल्ला अधिकारी टेकनारायण पौडेलले जानकारी दिए ।