संकटका बेला इसेवाको ‘ब्रह्मलुट’, ‘क्यासब्याक’ को नाममा सरकारले तोकेभन्दा धेरै हवाई भाडा !

काठमाण्डौ – कोरोनाको प्रकोप बढेको भन्दै बैंकिङ सेवा निशुल्क गरेको इसेवाले भित्रभित्रै भने संकटका बेला जनतालाई ‘लुट्ने’ काम गरिरहेको खुलासा भएको छ । कोरोनाका कारण जनताहरु त्राहिमाम भइरहेका बेला विद्युतीय भुक्तानी प्रदायक ‘इसेवा’ले सरकारले तोकेभन्दा धेरै हवाई भाडादर उल्लेख गरेको पाइएको हो । इसेवाले यतिसम्म जनता झुक्याउने काम गरेको छ कि उसले सरकारले तोकेभन्दा धेरै भाडा लिएर पुन: त्यसलाई पैसा फिर्ता दिने अर्थात ‘क्यासब्याक’ मा लगेर समायोजन गरी जनताको सेन्टिमेन्टमाथि खेल्ने दुष्प्रयास गरेको प्रयोगकर्ताहरुले दुखेसो पोखेका छन् ।

केहि उदाहरण हेरौं !

भद्रपुरको भाडा सरकारले आठ हजार नौ सय ६५ रुपैयाँ तोकेको छ । कुनै पनि हालतमा आठ हजार नौ सय ६५ रुपैयाँभन्दा धेरै भाडा लिन पाइँदैन । तर ई-सेवाले भने ९ हजार रुपैयाँ भाडा देखाएर पुन: क्यासब्याक भन्दै जनता झुक्याउने काम गरिरहेको छ । अर्को उदाहरणका लागि काठमाण्डौ-पोखराको अधिकतम हवाई भाडा चार हजार नौ सय ७५ रुपैयाँ हो । तर ई-सेवाले आइतबार बिहान ८ बजेको उडानको लागि पाँच हजार रुपैयाँ भाडा तोकेको छ । त्यसमा उसले ९४ रुपैयाँ क्यासब्याक दिने जनाएको छ । यो सरासर जनताप्रतिको बेइमानी हो भन्दा फरक पर्दैन । यस्तै काठमाण्डौ-विराटनगरको अधिकतम भाडा सात हजार चार सय ४० रुपैयाँ हो । तर ई-सेवाले सात हजार चार सय ५० रुपैयाँ लिएर टिकट दिएको छ । यसमा उसले एक सय ६२ रुपैयाँ क्यासब्याक दिएको भनेर जनताको आँखामा छारो हाल्ने दुर्श्प्रयास गरेको छ ।