काठमाडौं । कोरोना रोकथामका लागि सरकारले लगाएको लकडाउनको सातौं दिन ७ सय ४० जनालाई प्रहरीले उभ्याएको छ । सोमबार बिहान बिना कारण सडकमा निस्किएपछि उपत्यकाको विभिन्न ठाउँबाट उनीहरुलाई नियन्त्रणमा लिएर उभ्याइएको हो ।

आइतबारबाट लकडाउन उल्लंघन गर्नेलाई दुई घन्टा सडकमा उभ्याएर प्रहरीले कोरोना भाइरसबारे सचेतनामूलक प्रशिक्षण दिँदै आएको छ । महानगरीय प्रहरी आयुक्तको कार्यालय, रानीपोखरीका अनुसार सोमबार काठमाडौंबाट ५ सय ६० पुरुष र ९४ महिला गरी ६ सय ५४ जना, ललितपुरबाट ५९ पुरुष र ९ महिला गरी ६८ जना र भक्तपुरबाट १८ जनालाई उभ्याइएको छ ।

यो अवधिमा उपत्यकाका विभिन्न क्षेत्रबाट ७९ वटा दुई पांग्रे सवारी र ५ वटा चारपांग्रे सवारीलाई नियन्त्रणमा लिइएको छ ।