काठमाडौं । भारतका विभिन्न स्थानमा उडान गर्दै आएको नेपाल वायुसेवा निगमले चैत १६ गतेसम्म उडान स्थगित गरेको छ । निगमले भारतको नयाँ दिल्ली, मुम्बई र बैंगलोरको उडानमा चैत्र ९ गतेदेखि लागू हुने गरी स्थगित गरेको छ । 

डाइरेक्टोरेट जनरल अफ सिभिल एभिएसन, भारतद्वारा कोभिड १९ संक्रमण रोकथाम तथा नियन्त्रण सम्बन्धमा जारी गरिएको विज्ञप्ति अनुसार ती गन्तव्यको नियमित उडानहरु हाल चैत्र १६ गतेसम्मका लागि स्थगित गरिएको छ । यसअघि भारतले २२ तारिखबाट सबै अन्तर्राष्ट्रिय वायुसेवालाई भारतमा प्रवेश रोक्ने निर्णय गरेको थियो । सोही अनुसार नेपाल एयरलाइन्सले भारतीय शहरमा गरिरहेको उडान रोक्ने निर्णय लिएको हो ।

चैत्र ९ गतेदेखि उडान स्थगित गरिएको अवधिभरका लागि टिकट खरीद गरेका यात्रुहरुलाई टिकट फिर्ता गर्दा भुक्तानी गरेको रकम पूरै उपलब्ध गराइने भएको छ । यसअघि नेपाल एयरलाइन्सले दिल्ली उडान घटाएको थियो । पछिल्लो निर्णयसँगै निगमका अधिकांश उडान रद्द भएका छन् ।