काठमाडौं । नेपाल ग्याँसले अति समस्यामा परेका ग्राहकलाई उपत्यकाका विभिन्न स्थानबाट ग्याँस बिक्री गर्ने भएको छ । बालाजु औद्योगिक क्षेत्रको गेटबाट ग्याँस बिक्री गर्दै आएको कम्पनीले उपत्यकाको विभिन्न स्थानमा मिति तोकेरनै ग्याँस बेच्न लागेको हो ।

कम्पनीका कार्यकारी निर्देशक गोकुल भण्डारीले उपभोक्ताले खाना पकाउनै नपाएको अवस्थालाई ध्यानमा राखेर ग्याँस बिक्री गर्न लागेको जानकारी दिए । हामीले डिलरमार्फत पनि ग्यास पठाइरहेका छौं । तर उपभोक्ताले ग्याँस नपाएको भन्दै उद्योग परिसर बालाजुमै आउन थालेपछि वैकल्पिक व्यवस्थाको रुपमा उपत्यकाको विभिन्न स्थानमा ग्याँस बिक्री गर्न लागेका हौं।

उनका अनुसार चावहिल चोक र वाफल चोकमा बुधबार गते ग्याँस बिक्री गरिनेछ । सुरक्षाकर्मीको समन्वयमा त्यो क्षेत्रमा ५ सय ६० सिलिण्डर ग्याँस बिक्री गरिने उनले बताए । कोटेश्वर र वानियाँटार चोकमा विहिबार ग्याँस बिक्री गरिने भण्डारीले बताए ।

भनिमण्डल चोक र महाराजगंज चोकमा शुक्रबार ग्याँस बिक्री गरिने उनले बताए । उनले सबै क्षेत्रमा ५ सय ६० ग्याँस बिक्री हुने बताउँदै सुरक्षाकर्मीले त्यति मात्रै लाइनमा राख्ने बताए।