काठमाडौँ – नेपाल विद्युत प्राधिकरणले रघुपति जुट मिलको लाइन काटेको छ । प्राधिकरणको विराटनगर वितरण केन्द्रले मिलले डिटेकेटेड लाइनको १५ करोड ५५ लाख ६८ हजार रुपैयाँ वक्यौता रकम लामो समयदेखि नतिरेकाले बुधबार लाइन काटेको हो ।
केन्द्रका प्रमुख राजीवकुमार सिंहले दिएको जानकारी अनुसार करिब १० बजे ग्राहक नम्बर ०९–२४–५५३ रहेको उद्योगको लाइन काटिएको हो । सिंहले अदालतको आदेशअनुसार नै लाइन काटिएको बताए । जुट मिलले २०७२ साल साउनदेखि हालसम्म ट्रंक लाइन प्रयोग गरेबापत थप दस्तुरबाहेक १५ करोड ५५ लाख ६८ हजार रुपैयाँ तिर्न बाँकी थियो । तर मिलले गत कात्तिकसम्मको ११ करोड ९१ लाख रुपैयाँ ४४ किस्तामा तिर्ने सहमति गरेको थियो । सो अनुसार पैसा नतिरेपछि लाइन काटिएको प्रमुख सिंहले बताएका छन् । रघुपति जुटमिल गोल्छा समूह अन्तर्गतको कम्पनी हो ।
प्राधिकरणले गैरकानुनी रूपमा महसुल असुल गर्न लागेको भन्दै उद्योग पाटन र विराटनगर उच्च अदालतमा मुद्दा दायर गरेको थियो । पाटनले यसअघि नै प्राधिकरणको पक्षमा फैसला गरेको थियो । गत फागुन ५ गते विराटनगरले पनि उद्योगको मुद्दा खारेज गरेपछि प्राधिकरणलाई लाइन काटेर महसुल उठाउने बाटो खुला भएको थियो ।
