काठमाडौँ । काठमाडौंबाट लुटपाटका लागि मकवानपुर पुगेको महानगरीय प्रहरी कार्यालय रानीपोखरीको सीआरभी टोली पक्राउ परेको छ । मकवानपुरको पालुङमा प्रहरीका १ जना असई र २ जना जवान लुटपाट गर्न गएको समयमा पक्राउ परेका हुन् । पक्राउ पर्नेमा महानगरीय प्रहरी कार्यालय रानीपोखरीका असई सुरेन बस्याल र जवान हेमकान्त मगर तथा महानगरीय प्रहरी वृत्त दरबारमार्गका प्रहरी जवान वीरबहादुर बस्नेत रहेका छन् ।
घुमुवा प्रहरीले आर्थिक चलखेल गरेको गुनासो बढेपछि महानगरीय प्रहरी कार्यालय रानीपोखरीका प्रमुख डीआईजी विश्वराज पोखरेलले एसपी रेवती ढकालको कमाण्डमा सीआरभी टोली खटाएका थिए । सोही टोलीका सदस्य लुटपाटका लागि गएको समयमा पक्राउ गरिएको हो ।
बस्नेतलाई घुमुवा प्रहरीको टोली परिवर्तन गर्दा हटाइएको भए पनि उपराष्ट्रपति नन्दबहादुर पुनका छोरा दिपेश पुन र वनमन्त्री शक्तिबहादुर बस्नेतका भतिजा मुक्ति बस्नेतको सिफारिसमा पुनः सादा पोसाकमा खटाइएको थियो । उनीहरूको साथमा १ जना पत्रकारसमेत पक्राउ परेका छन् । पक्राउ परेका सुजन आचार्य आफुलाई ऋषि धमलाको सालो हुँ भन्दै विभिन्न ठाउँमा भन्दै आएका छन् । यस विषयमा प्रहरीले केहि समयपछि पत्रकार सम्मेलन गरी थप जानकारी गराउँदैछ।
