काठमाडौं । नेपाल उद्योग वाणिज्य महासंघले चैत २८ र २९ गतेका लागि तोकेको निर्वाचन स्थगित गरेको छ । बिहिबार महासंघको स्थायी समितिले यस्तो निर्णय गरेको हो । कोरोना भाइरसको संक्रमणको जोखिम रोकथामका लागि महासंघले २८ र २९ गतेका लागि तोकेको वार्षिक साधारण सभा स्थगित गरी अब आगामी जेठ ७ र ८ गते गर्ने निर्णय भएको बताईएको छ ।
यस्तै बुधबार बसेको कोभिड १९ रोकथाम तथा नियन्त्रण उच्च स्तरीय समन्वय समितिको बैठकले २५ जना भन्दा बढी भेलामा प्रतिवन्ध लगाएको छ भने सभा सम्मेलन नगर्न पनि आग्रह गरेको छ । बिहिबारबाट सुरु हुने भानिएको एसईई परिक्षा स्थगित भएको छ भने विश्वविद्यालय अन्तर्गतका सबै परीक्षा स्थगित गरिएको छ । लोक सेवा आयोगले पनि चैत ८ गतेपछिका सबै लिखित परीक्षा स्थगित गरेको छ ।
