- अर्थ सरोकार सम्बाददाता
काठमाडौं – वीरगंञ्जमा आइसोलेसनमा राख्ने तयारी हुँदाहुँदै एकजना बिरामीको मृत्यु भएको छ । कोरोनाको र्यापिड डायग्नोस्टिक टेस्ट (आरडीटी) पोजेटिभ देखिएकी वीरगञ्ज–१० अशोक बाटिका बस्ने २३ वर्षीया युवतीको मृत्यु भएको हो ।
उनी ब्लड क्यान्सरको समेत बिरामी रहेको नारायणी अस्पतालका मेडिकल सुपरिटेन्डेण्ट डा. मदन उपाध्यायले बताए । भरतपुर क्यान्सर अस्पतालमा गत चैत ५ गते ब्लड क्यान्सर भएको प्रमाणित भएको उनले बताए । चैत १३ गते स्वास्थ्यमा समस्या बढेपछि एडभान्स अस्पतालमा प्रारम्भिक उपचार गरिएको थियो । नेशनल मेडिकलमा कलेजमा उपचाका लागि गरेपपनि आईसीयु खाली नरहेको भन्दै विरामीको भर्ना नै नलिई फिर्ता पठाएपछि गएराती १० बजे तराई हस्पिटल एण्ड रिसर्च सेन्टरमा भर्ना गरिएको थियो ।
अस्पतालले अन्य जाँचसँगै आरडीटी परीक्षण गर्दा शंकास्पद रिपोर्ट आएपछि नारायणी अस्पतालको टोलीले फेरि पनि र्यापिड टेस्ट गरेको थियो । त्यसक्रममा एन्टिबडी पोजेटिभ देखिएपछि नारायणी अस्पतालमा आईसोलेसनमा राख्न लगिएको थियो । उनको सोही अस्पतालमा शनिबार मृत्यु भयो ।
उनमा आरडीटी रिपोर्ट पोजेटिभ देखिएपछि थ्रोट स्वाबको नमूना संकलन गरी परीक्षणका लागि हेटौंडास्थित प्रादेशिक प्रयोगशालामा पठाइएको छ ।
