अर्थ सरोकार सम्बाददाता
वीरगंज । लकडाउनको एक महिनामा वीरगंज नाका भएर निर्यात हुने वस्तुमा सबैभन्दा बढी पाम तेल देखिएको छ । वीरगंज भन्सारका अनुसार पछिल्लो एक महिनाको अवधिमा वीरगंज भन्सारबाट भारतमा करीब ४३ करोड ५ लाख ७३ हजार २८३ रूपैयाँ बराबरको ३४ लाख ३२ हजार ८५५ किलो पाम आयल भारतको बिहार र यूपीमा निर्यात भएको बताइएको छ ।
वीरगंज भन्सारको तथ्यांक अनुसार चैत ११ देखि वैशाख ८ गतेसम्म ४३ करोड बराबरको पाम आयल निर्यात भएको हो । सोयाबिन तेलतर्फ ८ करोड ६९ लाख १४ हजार ५ सय १२ रूपैयाँ बराबरको ६ लाख ३१ हजार ५५२ किलो सोयाबिन तेल भारत निकासी भएको वीरगंज भन्सार कार्यालयका भन्सार अधिकृत रमेश सुकमणिले जानकारी दिए । त्यसैगरी ५२ लाख ३४ हजार मूल्य बराबरको ३८ हजार २२० किलो सनफ्लावर तेल भारत निर्यात भएको जनाइएको छ ।
भारतको जम्मु काश्मिर मुद्दामा मलेशियाका प्रधानमन्त्री मोहम्मद महाथीरले विवादास्पद अभिव्यक्ति दिएपछि नेपाल, बङ्लादेश, भुटानलगायत देशबाट भारतमा आयात गरिने पाम तेलमा जनवरी ८ तारिखदेखि भारतको विदेश मन्त्रालयले रोक लगाएको थियो । त्यसपछि करिब डेढ महिना पाम आयालको निकासी ठप्प भएको थियो भने सोयाबिन र सनफ्लावर तेल निकासी यथावत भइरहेको थियो ।
ततपश्चात नेपाल सरकारले नेपालबाट भारततर्फ पाम तेलको निकासीबारे उद्योग तथा वाणिज्य मन्त्रालयमार्फत रोक फुकुवा गर्न अपिल गरेको थियो । सोही अनुसार एक महीनापछि फेब्रुअरी पहिलो सातामा भारतले पाम आयल निकासीको रोक फुकुवा गर्यो। ततपश्चात् नेपालबाट पुनः भारतमा पाम तेल निकासी भइरहेको छ ।
वीरगंज भन्सार अनुसार पछिल्लो एक महीनाको अवधिमा विदेशबाट ३ करोड ४० लाख ८ हजार राजस्व तिरेर ५१ करोड ७ लाख ५९ हजार मूल्य बराबरको ५० लाख ३५ हजार ९९५ किलो पाम आयलको कच्चा तेल नेपाल भित्रिएको थियो भने ११ करोड १२ लाख ५६ हजार राजस्व तिरेर १ अर्ब ४३ करोड ५५ लाख ८४ हजार मूल्य बराबरको १ करोड २८ लाख ११ हजार ३३५ किलो सोयाबिन कच्चा तेल नेपाल भित्रिएको थियो ।
त्यसैगरी ३ करोड ४६ लाख ५६ हजार राजस्व तिरेर २८ करोड २१ लाख ५९ हजार मूल्य बराबरको २८ लाख ५ हजार ६१२ किलो सनफ्लावरको कच्चा तेल नेपाल भित्रिएको थियो ।
