अर्थ सरोकार सम्बाददाता
वीरगञ्ज । वीरगञ्ज महानगरपालिका – १४ मा विपन्न नागरिकलाई वितरण गर्न लगिएको चामल गुणस्तरहीन पाइएको छ । बुधबार(हिजो) वितरणका लागि महानगरपालिकाले न्यू बोलबम राइस मिल र सुरज खाद्य स्टोरबाट ल्याएको ९ सय ५० किलो चामलमध्ये केही बोरा डल्ला परेको भेटिएको हो ।
राहत वितरण गर्न प्याकिङ गर्ने क्रममा चामलको बोरामा डल्ला भेटियो । बिन्दवासिनी ब्राण्डको बोरामा ६ महिनासम्म खान योग्य भनिए पनि उत्पादन मिति उल्लेख थिएन भने तौल पनि कम थियो । ९ सय ५० बोरा चामलमध्ये केही बोरा खोलेर हेर्दा गुणस्तरहीन देखिएको वडा अध्यक्ष भरतप्रसाद कुर्मीले बताए ।
‘प्याकिङ गराउन खोज्दा नयाँ पुराना चामल मिसिएको, डल्ला परेको चामल देखियो । कतिपय बोरामा उत्पादन मिति पनि थिएन, तौलमा पनि गडबड देखियो’ वडाध्यक्ष कुर्मीले भने । महानगरपालिकाले टेण्डर आह्वान गरी राहत वितरणका लागि चामल खरिद गरेको थियो । तर कुहिएको चामल पठाइएकोबारे अनुसन्धान नै नगरी बदमासी गर्नेलाई उन्मुक्ति दिन खोजिएको छ । जनप्रतिनिधि स्वयं साढे ४ सय क्वीन्टल चामलमा थोरै खराबी त आइहाल्छ भन्ने जस्ता अभिव्यक्ति दिइरहेका छन् ।
वीरगञ्जमा गुणस्तरहीन चामल भेटिएमा अनुसन्धान गर्नुभन्दा त्यो चामल फिर्ता पठाई अर्को ल्याउने गरिएको छ ।यसअघि पनि एक ट्रक चामल फिर्ता पठाएको वीरगञ्ज महानगरपालिकाका अधिकारी बताउँछन् । राहत वितरणको अनुगमन गर्न वीरगञ्ज महानगरपालिकाले कार्यपालिका सदस्य अरबिन्द गुप्ता, सुशील साह कानु र निरञ्जन सर्राफ रहेको अनुगमन समिति पनि बनाएको छ । अनुगमन समिति सदस्य अरबिन्द गुप्ता वडा नं १४ बाट मात्रै गुनासो आएको बताउँछन् ।
वीरगञ्ज महानगरपालिकाका नगर प्रमुख प्रमुख विजय सरावगीले वडा नं १४ मा बुधबार पठाएको ९ सय ५० किलो चामलमध्ये ३ वटा बोराको चामल डल्लो परेको भेटिएको स्वीकार गरे
