• अर्थ सरोकार सम्बाददाता

काठमाडौँ – नेपालका तेस्रा कोरोना सक्रमितसँगै दुबईबाट एयर अरेबिया एयरलाइन्समार्फत आएका  तीन जना युवामा कोरोनाको संक्रमण नभएको पुष्टि भएको छ । उनिहरु दुबईको सारजाहा विमानस्थलबाट उडान जी ९५३७ बाट गत चैत ४ गते नेपाल आएका थिए । माछापुछ्रे गाउँपालिका–२ सार्दिखोलाका अमृत पौडेल र दीपक गुरुङ तथा वडा नं ६ धितालका गोविन्दप्रसाद अधिकारीको कोरोनाको नतिजा ‘नेगेटिभ’ आएको हो । 

तीनै जनाको सोमबार पोखरामा गरिएको कोरोना परीक्षणबाट उनीहरुमा कोरोना सङ्क्रमण नदेखिएको प्रदेश स्वास्थ्य निर्देशक डा विनोदविन्दु शर्मालाई उद्धृत गर्दै गाउँपालिका अध्यक्ष कर्णबहादुर गुरुङले बताए । उनीहरुसँगै आएको व्यक्तिमा कोरोना सङ्क्रमण पुष्टि भएपछि तीनै जना होम क्वारेन्टाइनमा स्वास्थ्यकर्मीको निगरानीमा रहेका थिए ।