• अर्थ सरोकार सम्बाददाता 

सर्लाही – सर्लाहीमा एक १४ वर्षीय बालकमा कोरोनाको संक्रमण देखिएको छ । सर्लाही ६५ जनालाई यापिड डायग्नोष्टिक टेस्ट (आरडीटी) गर्दा एक १४ वर्षीय बालकमा पोजेटिभ देखिएको हो ।

शुक्रबार साँझ सर्लाहीको धनकौल गाउँपालिकाको क्वारेन्टाइनमा आरडीटी परीक्षण गर्दा एक १४ वर्षीय बालकलाई कोरोना पोजेटिभ देखिएको सर्लाहीका प्रमुख जिल्ला अधिकारी मोहनबहादुर जिसीले पुष्टि गरे ।

प्रमुख जिल्ला अधिकारी जिसीका अनुसार कोरोना पोजेटिभ देखिएका उक्त बालकको थप परीक्षणका लागि प्रादेशिक अस्पताल जनकपुरमा पठाइएको छ । साथै, उनीसँगै क्वारेन्टाइनमा रहेका एक अर्का व्यक्तिलाई र्‍यापिड टेस्ट गर्दा नेगेटिभ देखिए पनि थप परीक्षणका लागि उनलाई पनि जनकपुर पठाइएको उनले जानकारी दिए ।

कोरोना पोजेटिभ देखिएका ती बालक चैत २३ गते भारतको राजधानी दिल्लीबाट आफ्नो गाउँ धनकौल आएका थिए । भारतबाट आएको जानकारी सुरक्षाकर्मीलाई थाहा भएपछि ती बालकलाई आफ्नो घर नपुग्दै क्वारेन्टाइनमा राखिएको थियो ।