">
- अर्थ सरोकार सम्बाददाता
काठमाडौँ । व्यवसाय गर्नका लागि जिउंदै रहेकी आफुलाई मरेको बनाउँछ, त्यो पनि आफ्नै छोरोले । यस्तो सुन्दा एउटी आमालाई कस्तो हुन्छ होला ? हो, त्यस्तै भएको छ एक आमालाई । लकडाउनको समयमा झुटो विवरण दिएर सवारी पास लिने तीन जनालाई प्रहरीले पक्राउ गरेपछि यस्तो रहस्य खुलेको हो । प्रहरी प्रभाग पुल्चोकको टोलीले सप्तरी सुरुङ्गा नगरपालिका वडा नम्बर ६ महोलिया घर भएका शुभनारायण चौधरी, जितेन्द्र प्रसाद चौधरी र नरेश चौधरीलाई नियन्त्रणमा लिएको हो ।
शुभनारायण चौधरीले आमाको मृत्यु भएकोले काजकृया गर्न जान भन्दै जिल्ला प्रशासन कार्यालय ललितपुरबाट पास लिएको महानगरीय प्रहरी परिसर ललितपुर एसपी दुर्गा सिंहले बताइन् । उनकी आमाले यस्तो थाहा पाएपछि उनी भक्कानिएको उनका छिमेकीले बताए । जवकी उनकी आमालाई केहि भएको छैन । चौधरीले सोमबारदेखि लागू हुनेगरि एकदिनको लागि ३-०८-००५ ख ९१९८ नम्बरको भएको बसको पास लिएका थिए ।
सोमबार उनी ३० जना यात्रुहरु लिएर सप्तरी जना लाग्दा प्रहरीले उनलाई नियन्त्रणमा लिएर सोधखोज गरेको थियो। प्रहरीको अनुसन्धानमा आमाको मृत्यु भएको विवरण झुटो देखिएपछि नियन्त्रणमा लिएको एसपी सिंहले जानकारी दिइन।
