हेटौंडा । कोरोनाको जोखिम हुन नदिन लकडाउन जारी रहेपछि हेटौंडा औद्योगिक क्षेत्रमा रहेका उद्योगमा दैनिक रू.३० करोड घाटा भइरहेको छ । हेटौंडा औद्योगिक क्षेत्रमा ठूला र मझौला गरी १११ ओटा उद्योग छन् । औद्योगिक क्षेत्रमा ५ हजार कर्मचारीरसहित मजदूर कार्यरत रहेका छन् । लकडाउनका कारणले सो उद्योग बन्द भएपछि अहिले उद्योगको अवस्था दयनीय छ भने मजदूरको समेत रोजगारी गुमेको छ । लकडाउन हुनुभन्दा अगाडि प्रत्येक उद्योगको करीब रू.३ करोडभन्दा बढीको कारोवार हुने गरेको थियो ।
हेटौंडा औद्योगिक क्षेत्र व्यवस्थापन लिमिटेड कार्यालयका अनुसार अतिआवश्यक वस्तुहरु उत्पादन गर्ने २० र २१ उद्योग मात्र सञ्चालनमा रहेको छ । समाजिक दूरी तथा स्वास्थ्य जाँचको समेत व्यवस्था गरिएको ती उद्योगसमेत आंशिकरूपमा चलेका छन् । उद्योगमा कच्चा पदार्थ, मजदूर अभाव, दुवानी र विक्री वितरणको समस्याले आंशिकरूपमा चलेको छ । कार्यालय प्रमुख राजेन्द्र कँडेलका अनुसार अतिआवश्यक वस्तु उत्पादन गर्ने उद्योगमा दुग्ध उद्योग, खानेपानी उद्योग, बेकरी तथा बिस्कुट उद्योग, मैदा उद्योग, पशुपक्षी दान उद्योग, प्लास्टिक उद्योगलगायतका उद्योग सञ्चालनमा रहेका छन् ।
सञ्चालित उद्योग पनि मझौला उद्योगहरु हुन् । उद्योग बन्दले घाटा खानुपरेकाले बैंकको ऋण तिर्न समस्या परेको तथा कर्मचारीको तलब दिनुपर्नेलगायतका थुप्रै समस्या आएको उद्योग संघले बताएको छ । संघका अध्यक्ष लेखराज पोखरेलले उद्योगीको व्यापक गुनासो रहेको उल्लेख गरे । उद्योग बाहिर बस्ने मजदूरलाई काम गर्न जाँदा बाटोमा प्रहरीले अप्ठ्यारो पार्ने गरेको मजदूरको गुनासो छ । त्यस्तै हेटौंडा सिमेन्ट उद्योग, शिवम सिमेन्ट उद्योग, रिद्धिसिद्धि सिमेन्ट उद्योग र एशियन पेन्टस उद्योगलगायतका अन्य ठूला उद्योग बन्द छन् ।
त्यसैगरी हेटौंडा उपमहानगर क्षेत्रमा रहेका कवाड खानामा कवाड संलग्न गर्ने मजदूर पनि बेरोजगार छन् । लोहा, टिना प्लास्टिक तथा सिसाको बोतल र टुटफुट भएका सामान संकलन गर्ने व्यवसायी एवं मजदूरी गर्ने कारोवार ठप्प छ । हेटौंडामा विभिन्न टोलमा गरी चार दर्जनभन्दा बढी कावारखाना रहेको र ५०० भन्दा बढी मजदूर आश्रित रहेको हेटौंडा–४ कवाडखानाका सञ्चालक राम एकवाल गुप्ताले जानकारी दिए ।
सर्लाही सुदरमुकामका बासिन्दा रहेका हेटौंडामा कवाड संकलन गर्ने दिनेश साहले मासिक रू।२५ हजार कमाउने गर्थे तर लकडाउनले खानपनमा समेत आपत परेको गुनासो गरे । त्यस्तै ग्रिल र फर्निचर उद्योगमा कार्यरत मजदूर उद्योगीको समेत समस्या भएको गुनासो छ । वाग्मती प्रदेश नेपाली काँग्रेस प्रतिपक्षी दलका नेता ईन्द्रबहादुर बानियाँले मजदूरको समस्याप्रति सरकार गम्भीर नभएको आरोप लागाएका छन् । रासस
