• अर्थ सरोकार सम्बाददाता 

काठमाडौं – भारतमा दिनानुदिन कोरोना संक्रमणबाट मृत्यु हुनेको संख्या बढ्दै गइरहेको छ। भारतमा अहिलेसम्म नौ सय बढीको मृत्यु भइसकेको छ । भारतिय स्वास्थ्य मन्त्रालयका अनुसार पछिल्लो २४ घण्टामा मात्र भारतमा थप ६२ जनाको मृत्यु भएको हो । यस संगै ज्यान गुमाउनेको संख्या नौ सय ३४ पुगेको छ । साथै संक्रमितको संख्या पनि २९ हजार चार सय ३५ पुगेको छ ।

भारतमा अहिलेसम्म सबै भन्दा बढी प्रभावित राज्य महाराष्ट्र रहेको छ महाराष्ट्रमा तीन सय ६९ जनाको मृत्यु भइसकेको छ भने आठ हजार पाँच सय ९० जना संक्रमित छन् । त्यस्तै गुजरातमा अहिलेसम्म एक सय ६२ जनाको मृत्यु भइसकेको छ । मध्यप्रदेशमा पनि एक सय १० जनाको मृत्यु भएको छ । 

भारतको उत्तर प्रदेशमा अहिलेसम्म एक हजार नौ सय ५५ जनामा यो भाइरसको संक्रमण देखिँदा ३१ जनाको मृत्यु भइसकेको छ । त्यस्तै बिहारमा तीन सय ४५ जनामा यो भाइरसको संक्रमण देखिएको छ भने दुई जनाको मृत्यु भएको छ । अहिलेसम्म भारतमा ६ हजार आठ सय ६९ संक्रमित निको भएर घर फर्किसकेका छन् ।