- अर्थ सरोकार सम्बाददाता
काठमाडौं – जापानले पनि नेपालमा रहेका आफ्ना नागरिक लैजाने भएको छ । नेपाल एयरलाइन्सको विमान शुक्रबार जापानी नागरिक लिएर जापान प्रस्थान गर्न लागेको नेपाल वायुसेवा निगमले जनाएको छ । विमान साँझ ८ बजे नेपालबाट जापानका लागि प्रस्थान गर्नेछ । विमान जापानको नारिता विमानस्थलमा अवतरण हुनेछ।
कोरोना भाइरसको विश्वव्यापी महामारी र निरन्तरको लकडाउनका कारण विभिन्न देशले धमाधम नेपालमा रहेका आफ्ना नागरिकहरु विमान चार्टर्ड गरेर लगिरहेका छन् । यसअघि अमेरिका, अस्ट्रेलिया, बेलायत, जर्मनी, फ्रान्स र नेदरल्यान्ड्ले नेपालबाट आफ्ना नागरिक फिर्ता लगेका छन् । सोहि अनुसार आज जापानले पनि आफ्ना नागरिक लैजाने भएको हो ।
पछिल्लोपटक बेलायतले बुधबार टाइटन एयरमार्फत आफ्ना नागरिक नेपालबाट लगेको थियो। बेलायतले नेपालमा रहेका आफ्ना बाँकी नागरिकलाई लिन शुक्रबार पनि टाइटन एयर पठाउँदै छ। सोही दिन टाइटन एयर फर्कनेछ।
