सत्तारुढ नेकपा फुटको संघारमा पुग्दा कार्यकर्तास्तरबाट व्यंग्यात्मक सुझाव आउन थालेको छ । यसै बीच लामो समय कम्युनिष्ट आन्दोलनमा होमिएका र हाल पत्रकारितामा सक्रिय रहेका रुकुमका मेघराज खड्काले पनि प्रचण्ड र ओलीलाई एक्लिन सुझाव दिएका छन् ।
‘एकतापछी नेकपा ठूलो पार्टी भो, सदस्य र कार्यकर्ताको हुल ठुलो भो, ठूलो जेटमा यात्रा गर्नु पर्ने अवस्था आयो । यहि क्रममा विश्वमा कोरोना भाइरस महामारी आयो । हुल सहित जेटमा यात्रा गर्दा कोरोना सर्ने सम्भावना भयो । त्यसकारण पुरानै तरिकाले आआफ्नो घरमा बस्ने सर्कुलेसन जारी पनि हुन सक्छ । यसलाइ अन्यथा नसोचौ कमरेडहरु । यो बेला मिल्ने भन्दा पनि जतिसक्दो एक्लिदा नै राम्रो हुन्छ ।’ उनले फेसबुकमा लेखेका छन् ।
सुन्दा रमाइलो सुनिएपनि यो लेखाइमा पार्टीभित्रको वितृष्णा छचल्किएको छ ।
यता प्रधानमन्त्री निवास बालुवाटारमा मन्त्रिपरिषद बैठक सकिएलगत्तै सरकारमा रहेका पूर्वमाओवादी खेमाका मन्त्रीहरुको बेग्लै बैठक बसेको छ । बैठकपछि अध्यक्ष प्रचण्डलाई भेट्न उर्जामन्त्री वर्षमान पुन खुमलटारतर्फ लागेका छन् भने अन्य मन्त्रीहरु पनि प्रचण्ड निवास पुगेका छन् । बालुवाटारमा बसेको मन्त्रिपरिषद बैठकमा दलसम्बन्धी कानून संशोधनका लागि अध्यादेश ल्याइएको थियो ।
कोरोना भाइरसका कारण देश नै संकटमा परेको बेला ओलीले पार्टी विभाजनको अध्यादेश एकाएक पारित गराएपछि तर्सिएका नेकपाका अर्का अध्यक्ष प्रचण्डले पूर्वमाओवादीका सबै मन्त्रीलाई ललितपुरको खुमलटारस्थित आफ्नो निवासमा बोलाएका छन् ।
आफूहरुसँग सल्लाह नै नगरी यस्तो अध्यादेश ल्याएपछि रुष्ट पूर्व माओवादीको तर्फबाट मन्त्रालयमा सहभागी मन्त्रीहरुको आजै सामूहिक राजीनामा आउनसक्ने संभावना समेत रहेको माओवादीस्थित उच्च स्रोतले जानकारी दिएको छ । यसैबीच प्रचण्डसँगको बैठकमा एक मन्त्रीले आजै सबैले राजिनामा दिउँ, ‘कांग्रेसको समर्थनमा सरकारमा जाउँ’ भन्ने प्रस्ताव राखेको पनि उच्च स्रोतको दाबी छ ।
