• अर्थ सरोकार सम्बाददाता 

वीरगञ्ज । पर्साको वीरगञ्जमा तीन जना भारतीय नागरिकसँग भेट गरेका २६ जना व्यक्तिलाई क्वारेन्टाइनमा राखिएको छ । शनिबार बेलुका नै उनीहरुलाई वीरगञ्जको सिद्धार्थ माविस्थित क्वारेन्टाइनमा राखिएको हो । 

वीरगञ्जबाट बिहिबार २४ जनाको थ्रोट स्वाब संकलन गरी परीक्षणका लागि हेटौंडामा पठाइएको थियो । जसमा  तीनको रिपोर्ट ‘पोजेटिभ’ आएको थियो  भने अन्यको रिपोर्ट ‘नेगेटिभ’ आएको थियो । वीरगञ्ज–२ छपकैया घुसुकपुरस्थित हजरत बिलाल मस्जिदबाट १० जना जमाती, तीन जना मौलाना र २ जना स्थानीयलाई र छपकैयाकै मक्की जामे मस्जिदबाट ११ जनालाई नियन्त्रणमा लिएर क्वारेन्टाइनमा राखिएको हो । 

संक्रमित व्यक्तिको सम्पर्कमा रहेका २६ जनालाई क्वारेन्टाइनमा राखिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक वीरेन्द्र शाहीले जानकारी दिए ।