- अर्थ सरोकार सम्बाददाता
कास्की – गण्डकी प्रदेश सरकारले स्थापना गरेको कोरोना भाइरस रोकथाम कोषमा भाटभटेनी सुपरमार्केट एण्ड डिपार्टमेण्टल स्टोर्सले २५ लाख सहयोग गरेको छ । प्रदेशका मुख्यमन्त्री पृथ्वीसुब्बा गुरुङलाई पोखरा–९ न्यूरोडमा अवस्थित सो सुपरमार्केटक शाखा प्रवन्धक चक्र लालचनले बुधबार उक्त रकम बराबरको चेक हस्तान्तरण गरेका हुन् ।
मुख्यमन्त्री गुरुङले विपद्को सामना गर्नका लागि सरकारले खडा गरेको कोषमा रकम जम्मा गरेकामा भाटभटेनी सुपरमार्केटप्रति आभार व्यक्त गरे । साथै अन्य इच्छुक व्यक्ति तथा संस्थालाई समेत रकम जम्मा गरेर सहयोगका लागि आग्रह गरे ।
सरकारले सो भाइरसको जोखिम न्यूनीकरण, उपचार तथा राहत वितरणका लागि चैत १२ गते उक्त कोष स्थापना गरेको हो । कोषमा सार्वजनिक तथा निजी सङ्घसंस्था र व्यक्तिबाट रकम जम्मा हुने क्रम जारी रहेको छ ।
