">
- अर्थ सरोकार सम्बाददाता
बिराटनगर । बिराटनगरका एक बैंकर आफ्नो मेलमा आएको एउटा मेसेज देखेर झसङ्ग मात्र भएनन् डराए पनि । देशभर लकडाउन गरिएको छ । बोर्डर एरिया भएकाले आफ्नो ठाउँ मा कोरोनाको त्रास छ । तर यहि बेला बैंकले के के न बितेजसरी बैसाख ३, २०७७ बाट सबै स्टाफहरुलाई बैंकमा हाजिर हुन भनेको छ । व्यवस्थापनको निर्णय भन्दै यस्तो मेसेज आएपछि उनलाई दोधार भयो । जागिर खान जाउँ, स्थिति यस्तो भयावह छ । नजाउँ हाकिमले मेसेज गरिसके ।
जोखिममा सप्तकोशीका कर्मचारी
बिराटनगर बोर्डर एरिया भएकाले जोखिमयुक्त ठाउँ छ । त्यसैले पनि उनलाई डर भएको हो । परिवारले यस्तो बेला पनि निस्कने हो ? भनेर गाली गर्ने स्थिति छ । यहिबेला बैंकले पेलिरहेको छ । सोहि बैंकका अर्का एक कर्मचारीले अर्थ सरोकारमा फोन नै गरेर भने, ‘म त लोनको कर्मचारी, म किन बैंक जाने यस्तो बेलामा । न नयाँ काम छ, न रिकभरीमा लाग्न सक्ने स्थिति छ । तर बैंकले एकोहोरो रुपमा पेलेको छ ।’ उनका अनुसार बैंकमा सुरक्षा पनि राम्रो छैन । ‘को खोक्दै आउँछ, को रुघा लागेर आउँछ, आएकालाई नआइजो भन्न पनि नमिल्ने होला । न गतिलो मास्क दिएको छ बैंकले । ज्यान नै जोखिममा पर्ने भो ।’
के भन्छ बैंक ?
यता यस विषयमा बुझ्न हामीले बैंकका सूचना अधिकारीसमेत रहेका बिदुर पोख्रेललाई फोन गर्यौं । उनले बैसाख ३ गतेबाट आफुले कर्मचारीहरुलाई बोलाएको स्वीकारे । ‘हाम्रो सर्भिस राम्रो छ । सर्भिस पनि दिनुपर्यो ।’ उनले भने । उनले बैंकमा सेनिटाईजर लगायतका चीजहरु भएकाले काम गर्न कुनै पनि अफ्ट्यारो नभएको दावी गरेका छन् । ‘निश्चित समयका लागि बैंक खोल्न लागेका हौँ । दिउँसो १ बजेसम्म खोल्छौं । कतिपय कर्मचारी घरमा हुनुभएको ले उहाँहरुलाई बोलाएको छैन । उपलब्ध भएका कर्मचारीहरुबाट सेवा दिन खोजेका हौँ ।’ उनले भने।
