- एजेन्सी
काठमाडौँ – स्पेनमा एक महिनाको लकडाउनपछि सरकारले केही खुकुलो बनाउने भएको छ । लकडाउनका कारण घरभित्रै बसिरहन बाध्य स्पेनका बालबालिकाहरु घर बाहिर निस्किन पाउने भएका छन् ।
स्पेनले सरकारले २७ अप्रिलदेखि बालबालिकाहरुलाई बाहिर निस्किन दिने भएको हो । प्रधानमन्त्री पेद्रो सान्चेजले २७ अप्रिलदेखि लकडाउन केही खुकुलो बनाउने र बालबालिकाहरुलाई घरबाहिरको ताजा हावा लिन दिने प्रतिबद्धता जनाएका छन् । तर यो कसरी गरिनेछ भनेर उनले केही जानकारी दिएका छैनन् ।
स्पेनका प्रधानमन्त्री पेद्रो सान्चेजले देशमा लगाइएको लकडाउनलाई ९ मेसम्म बढाउने घोषणा गरेका छन् । प्रधानमन्त्रीले देशको हालको स्थिती हेर्दा लकडाउनलाई थप १५ दिनसम्मका लागि बढाउनका लागि संसदलाई गुहार्ने बताएका छन् ।
स्पेनमा १४ मार्चदेखि देश पूर्ण रुपमा लकडाउन छ । शनिबार देशमा कोरोनाभाइरसका कारण भएको मृतकको आँकडा साढे २० हजार पार गरेको छ । यो आँकडासहित कोरोनाभाइरसका कारण हुने मृत्युको संख्यामा स्पेन तेस्रो स्थानमा परेको छ । वर्ल्डोमिटर्सका अनुसार पहिलो स्थानमा ३९ हजार बढी मृतकसहित अमेरिका पहिलो स्थानमा परेको छ, २३ हजार बढी मृतकको संख्यासहित इटली दोस्रो स्थानमा रहेको छ ।
