">
- अर्थ सरोकार सम्बाददाता
सिल्धुपाल्चोक । तातोपानी नाका सञ्चालनमा आएको छ । विश्व स्वास्थ्य संगठनको मापदण्ड बमोजिमको ‘हेल्थ डेस्क’ राखेर हिजो साँझबाट नाका सञ्चालनमा आएको हो । उक्त नाकाबाट पहिलो लटमा मास्क र सेनिटाइजर भित्रिएका छन् । प्रशासन, भन्सार, जनप्रतिनिधि र सुरक्षाकर्मीको छलफल पछि सुरक्षित रूपमा नाका खोलिएको भोटेकोसी गाउँपालिकाका प्रमुख राजकुमार पौडेलले जानकारी दिए ।
बिएम डेर्डीका व्यवसायीले खरिद गरेको मास्क र सेनिटाइजर चिनियाँ प्रहरीले परीक्षण गरेर नेपाली चेकपोस्ट ल्याइदिएको पौडेलले बताए । ७५ सय वटा मास्क र ५ सय सेनिटाइजर हेल्थ डेस्कमा जाँचेर भन्सार कार्यालयको यार्डमा लगिएको थियो । चीनबाट भित्रिएका उक्त वस्तु नाकामा कीटनाशक औषधि छर्केर काठमाडौं पठाइएको बताइएको छ । कोरोना संक्रमणको जोखिम बढेपछि गत माघ १३ गतेदेखि तातोपानी नाका बन्द थियो ।
